Да воскреснет Бог, и расточатся врази Его, и да бежат от лица Его ненавидящий Его; яко исчезает дым, да исчезнут; яко тает воск от лица огня, тако да погибнут беси от лица любящих Бога, и знаменующихся крестным знамением, и в веселии глаголющих: радуйся, Пречестный и Животворящий Кресте Господень, прогоняяй бесы силою на тебе пропятаго Господа нашего Иисуса Христа, во ад сшедшаго и поправшаго силу диаволю, и даровавшаго нам тебе, Крест Свой Честный, на прогнание всякаго супостата. О, Пречестный и Животворящий Кресте Господень, помогай ми со Святою Госпожею Девою Богородицею и со всеми святыми во веки. Аминь.

О, Всечестный и Животворящий Кресте Господень, Кровию Христа Бога нашего освященный, и смертию Его нас от смерти вечныя свободивый, на тебе изволившему пострадати, весь народ искаше прикасатися, яко сила от него исхождаше, и исцеляше вся. Ты еси знамение победы на врагов наших видимых и невидимых; ты имаши явитися в час Страшнаго Суда Христова; тебе смиренно покланяюся, честно прикасаюся и любезно тя лобызаю, нынешнее моление к Распятому на тебе принося, да исцелит мя силою в тебе Своею от всех недугов душевных и телесных, и сохранит от врагов видимых и невидимых, и неосужденна на Суде Своем одесную поставит. Ей, Животворящий Кресте святый, на тебе Спас умирая за умерших грехами человеков, Дух Свой яко человек испусти, Кровь же и воду источи, и сими треми едино, еже паче всех есть на потребу, спасение нам содела: во славу источника вод живых Бога Отца, Себе же от кровей Девических воплощенна Бога Сына, и Бога Духа Святаго, оживляющаго дух человечь; Ихже Триех во Едином Божестве пособи и мне славити благодарственно, от воды крещения восприятою верою непорочною, в причастии же Плоти и Крове Господня надеждою несумненною, и в покаянии от духа сокрушенна, любовию нелицемерною; ниже токмо в жизни сей плачевной, яко вода мимотекущей, бранен и кровей исполненной и яко пара исчезающей с воздыханием, но и в будущей блаженной, пособием силы твоея, Кресте треблаженне, да прославлю самым лица зрением верованнаго, одержанием чаяннаго и наслаждением любимаго, Единаго в Троице Бога, славимаго в безконечныя веки. Аминь.

Господи, обрати к Тебе и сердца врагов (воров[569]) наших, и если не возможно уже ожесточенным обратиться, то положи преграду зла их и защити от них избранных Твоих, молитвами Богородицы и всех святых Твоих. Аминь.

Все тщание гордого диавола состоит в том, – говорил преподобный отец наш Серафим, Саровский чудотворец, – чтобы возмутить дух. человека и в возмущении посеять свои плевелы. Когда же человек старается иметь сердце смиренное и мысль сохранить в мире, тогда все козни вражий бывают бездейственны; ибо где мир помыслов, там почивает Сам Бог: в мире, сказано, место Его.

Когда мы искренне каемся во грехах наших и обращаемся ко Господу нашему Иисусу Христу всем сердцем нашим, Он радуется нам, учреждает праздник и созывает на него любезные Ему силы, показывая им драхму, которую Он обрел паки, т. е. царский образ Свой и подобие. Возложив на рамена заблудшую овцу. Он приводит ее ко Отцу Своему. В жилище всех веселящихся Бог водворяет и душу покаявшагося вместе с теми, которые не отбегали от Него. Итак, несомненно приступай к покаянию, и оно будет ходатайствовать за тебя пред Богом. По возможности твори сию молитву преподобного Антиоха:

Дерзая, Владыко, на бездну благоутробия Твоего, приношу Тебе от скверных уст и нечистых устен молитву сию. Помяни, яко призвася на мне имя святое Твое, и искупил мя еси ценою Крове Твоея, яко запечатлел мя еси обручением Святаго Духа Твоего, и возвел мя еси от глубины беззаконий моих, да не похитит мя враг. Иисусе Христе, заступи мя и буди ми Помощник крепкий в брани, яко раб есмь похоти и воюем от нея. Но Ты, Господи, не остави мя на земли повержена во осуждении дел моих: свободи мя, Владыко, лукаваго рабства миродержителя и усвой мя в заповедех Твоих. Путь живота моего, Христе мой, и свет очей моих – лице Твое. Боже, Владыко и Господи, возношения очей моих не даждь ми, и похоть злую отстави от мене; заступи мя рукою Твоею святою. Пожелания и похотствования да не обымут мя и душе безстудней не предаждь мене. Просвети во мне свет лица Твоего, Господи, да не обымет мене тьма, и ходящий в ней да не похитят мя. Не предаждь, Господи, зверем невидимым душу исповедающуюся Тебе. Не попусти, Господи, уязвитися рабу Твоему от псов чуждих. Приятелище Святаго Духа Твоего быта мя сподоби, и дом Христа Твоего, Отче Святый, созижди мя. Путеводителю заблуждших, путеводствуй мя, да не уклонюся в шуяя. Лице Твое, Господи, видети вожделех. Боже, светом лица Твоего путеводи мя. Источник слез даруй ми, рабу Твоему, и росу Святаго Духа даждь созданию Твоему, да не изсохну, яко смоковница, юже Ты проклял еси: и да будут слезы питием моим и молитва пищею моею. Обрати,

Господи, плач мой в радость мне, и приими мя в вечныя Твоя скинии. Да постигнет мя милость Твоя, Господи, и щедроты Твоя да обымут мя, и отпусти вся грехи моя. Ты бо еси Бог истинный, отпущаяй беззакония. И не попусти, Господи, посрамитися делу рук Твоих по множеству беззаконий моих, но воззови мя, Владыко, Единородным Твоим Сыном, Спасителем нашим. И воздвигни мя во грехах лежащаго, яко Левия мытаря, и оживотвори мя грехми умерщвленнаго, яко сына вдовицы. Ты бо еси воскресение мертвых, и Тебе слава подобает во веки. Аминь.

Отчаяние, по учению св. Иоанна Лествичника, рождается от сознания множества грехов, когда душа, множеством язв покрытая, от невыносимой их боли погружается во глубину отчаяния, или от гордости и возношения, когда кто почитает себя не заслуживающим того греха, в который впал. Первое врачуется воздержанием и благою надеждою, а второе – смирением и неосуждением ближнего (Лествица, степ. 26). И с умилением будем молиться ко Господу:

Владыко, Господи небесе и земли. Царю веков! Благоволи отверзти мне дверь покаяния, ибо я в болезни сердца молю Тебя, Истиннаго Бога, Отца Господа нашего Иисуса Христа, Света Mipy. Призри многим Твоим благоутробием и приими моление мое; не отврати его, но прости мне, впадшему во многия прегрешения. Приклони ухо Твое к молению моему и прости мне все злое, кое соделал я, побежденный моим произволением. Ибо ищу покоя, и не обретаю, потому что совесть моя не прощает мя. Жду мира, и нет во мне мира по причине глубокаго множества беззаконий моих. Услыши, Господи, сердце вопиющее к Тебе, не посмотри на моя злая дела, но призри на болезнь души моея и поспеши уврачевать мя, жестоко уязвленнаго. Дай мне время покаяния ради благодати человеколюбия Твоего, и избавь мя от безчестных дел, и не возмерь мне по правде Твоей, и не воздай достойное по делом моим, дабы мне не погибнуть совершенно. Услыши, Господи, мя, в отчаянии находящагося; ибо я, лишенный всякой готовности и всякой мысли ко исправлению себя, припадаю к щедротам Твоим: помилуй мя, поверженнаго на землю и осужденнаго за грехи моя. Воззови мя, Владыко, плененнаго и содержимаго моими злыми деянии и как бы цепями связаннаго. Ибо Ты един ведаешь разрешать узников, врачевать раны никому не известные, которыя знаешь только Ты, ведущий сокровенное, и потому во всех моих злых болезнех призываю только Тебя – Врача всех страждущих, Дверь рыдающих вне, Путь заблудившихся, Свет омраченных. Искупителя заключенных, всегда сокращающаго десницу Свою и удерживающаго гнев Свой, уготованный на грешники, но ради великаго человеколюбия дающаго время покаянию. Возсияй мне свет лица Твоего, Владыко, тяжко падшему, скорый в милости и медлящий в наказании. И Твоим благоутробием простри мне руку и возстав мя из рова беззаконий моих. Ибо Ты Един Бог наш, не веселящийся о погибели грешников и не отвращающий лица Своего от молящагося к Тебе со слезами. Услыши, Господи, глас раба Твоего, вопиющаго к Тебе, и яви свет Твой на мне, лишенном света, и даруй мне благодать, дабы я, не имеющий никакой надежды, всегда надеялся на помощь и силу Твою. Обрати, Господи, плач мой в радость мне, расторгни вретище и препояши мя веселием. И благоволи, да упокоюсь от вечерних дел моих, и да улучу упокоение утреннее, как избранные Твои, Господи, от которых отбежали болезнь, печаль и воздыхание, и да отверзется мне дверь Царствия Твоего, дабы вошедши, с наслаждающимися светом лица Твоего, Господи, получить мне жизнь вечную во Христе Иисусе Господе нашем. Аминь.